लघुकथा : गुरू सम्मान ✍️ ध्रुवराज थापा 'पुरूष' (काभ्रे, पनौती, हालः कपन, काठमाडौँ) एक जत्था मुल ढोकामा देखापरे ! आफ्ना गुरूलाई भेट्ने भनेपछि चौकिदारले पनि ढोका खोलिदिए, किन कि आजको विशेष दिनमा उनलाई पनि गुरू सम्मान हेर्ने रहर थियो । आज गुरू पुर्णिमाको दिन विद्यार्थीको हुल सरासर प्राध्यापक कक्षभित्र प्रवेश गरे ! नाईकेले भन्यो, "खोई झोलाबाट माला झिक !" सहयोगीले माला झिकेर दियो । नाईकेले जबरजस्ती माला लगाईदियो र भन्यो, "खोई सगुन पनि निकाल !" सहयोगीले झोलाबाट सिसी निकालेर दियो । नाईकेले आफ्नो गुरूको मुखभरी सगुन दलिदियो । भिडले भनयो, "अब एउटा फोटो खिचौँ , पत्रिकामा पनि त दिनुपर्यो !" सम्मानीत गुरूलाई बिचमा राखेर फोटो पनि खिचे । नेताले गर्वका साथ उद्घोष गरे, "प्रयोगात्मक परीक्षामा हामीलाई राम्रो नम्बर नदिए हामी अर्को वर्ष पनि यसरी नै कालो मोसो र जुत्ताको मालाले गुरू सम्मान गर्छौँ !" यत्तिकैमा पुलिसको साईरनको आवाज सुनियो । प्रहरीले क्षणभरमै चारैतिरबाट घेरा हाल्यो ! रचनाकाल : २०८१ श्रावण ५ Sent from Gmail Mobile
