लघुकथा : प्रेमपत्र

लघुकथा : प्रेमपत्र

✍️ ध्रुवराज थापा 'पुरूष'

(काभ्रे, पनौती, हालः कपन, काठमाडौँ)

उनको प्रेमपत्रको ब्यहोरा यस प्रकार थियो-

मेरो मालिक मेरो राजा, अटुट प्रेम अनि दिनैपिच्छेको सम्झना !'

'ति दिन सम्झदा अहिले पनि रोमान्चित हुन्छु, भावनाको पोखरीमा चुर्लुम्म डुब्छु । हजुर बिनाको म र म बिनाको हजुर, हामी कल्पना पनि गर्न सक्दैन थियौँ । हाम्रो चखेवा चखेवीको जस्तै जोडी थियो ।'

उनले पत्रमा भावुक हुदै थिपन्- 

'हामी नपुगेको कुनै पार्क छैन होला । मठमन्दिर जान पनि मैले हजुरलाई साथ दिएकै थिएँ । हजुरले मलाई कति मायागर्नुहुन्थ्यो, ति ममताभरी हातले कति सुम्सुमाउनु हुन्थ्यो ! उफ् म कल्पना पनि गर्न सक्दिन ! मेरो स्वास्थ खराब नहोस्भनेर नियमित जाँच पनि गराउनु हुन्थ्यो । म बिरामी पर्दा, डाक्टरकोमा लगेर मेरा लागि कति खर्च गर्नुहुन्थ्यो ! म बिर्सनैसक्दिन !'

उनी रोमान्चित हुदै अगाडी लेखिन्-

'म सुन्दरी भएको हजुरलाई हेर्ने कति रहर थियो हगी ? म फोहोरी भएँ भनेर नुहाउन घर बाहिर बाहिर लिएर जानुहुन्थ्यो ।कुनैदिन हजुर आफैँले घरमै साबुन दलेर मिचीमिची नुहाईदिएको मिठो स्मरण ताजै छ ! श्रृङ्गार गृहमा लगेर सिङ्गारेरल्याएको झल्झल्ती सम्झना आईरहेको छ ।

उनी मुटु गरूङ्गो पारेर अगाडि लेख्छिन्-

अहिले हजुरको स्तर बढ्दै गयो म पुरानी भएँ , हजुरलाई नयाँ नयाँ चाहीयो, उ प्रति हजुरको मन गयो । उसको प्रेममापर्नुभयो । घरमा पनि लिएर आउनु भयो । म चुपचाप हेरेर बसेँ, सहेर बसेँ । 

अन्तमा मुटु अमिलो पार्दै उनी लेख्छिन-

आजभोली मलाई एउटा कुनामा थन्क्याएर जहाँ जादा पनि उसैलाईमात्र लिएर जानुहुन्छ । उसले मेरो स्थान ओगटेकी छ। तर महिनामा ३/४ दिन मेरो मन राखिदिन भए पनि आउनुहुन्छ । त्यो पनि आफ्नै स्वार्थले ! म बिग्रन्छु भनेर ! ठिकै छ ।हजुरको जो मर्जी ! तर म अझै पनि हजुरलाई सेवा दिन सधैँ तयार छु ! 

म सोच्छु मैले त्यस्तो के अपराध गरेको थिएँ र ? मेरो विकल्प खोज्नुभयो ?

मेरो कमजोरी मात्र यही थियो कि म उनी जस्तै चारपाङ्ग्रे भईन ।

उहि तपाईँ की प्यारी पुरानी

'स्कुटी'

मिति: २०८१ असार २४