कविता : आउ हामी सबै मिलेर देश लुटौँ
कविता : आउ हामी सबै मिलेर देश लुटौँ
✍️ ध्रुवराज थापा 'पुरूष'
(काभ्रे, पनौती । हाल: कपन, काठमाडौँ ।)
आउ हामी सबै मिलेर देश लुटौँ
सरकार बनाएर लुटौँ
सरकार ढालेर लुटौँ
गुटबन्दि गरेर लुटौँ ।
फकाएर लुटौँ,
धम्क्याएर लुटौँ
जो जो जहाँ छौँ, त्यहीँबाट लुटौ ।
वडामा हुनेले वडाबाटै लुटौँ,
पालिका पालिकामा लुटौँ ।
प्रदेश प्रदेशमा लाजै पचाएर लुटौँ !
संसदमा लुटौँ
मन्त्री बनेर लुटौँ
सेनामा लुटौँ
प्रहरीमा लुटौँ ।
हामीले नलुटे कस्ले लुट्ने ?
अहिले नलुटे कहिले लुट्ने ?
जातको नाममा लुटौँ,
धर्मको नाममा लुटौँ
भूमाफिया बनेर किसानको जमिन लुटौँ,
नेता बनेर ललिता निवास लुटौँ ।
जजस्ले जति सक्छ त्यति लुटौँ।
उठ्नै नसक्ने गरी लुटौँ,
तन्नमहरि हुनेगरी लुटौँ ।
हामीले नलुटे कस्ले लुट्ने ?
अहिले नलुटे कहिले लुट्ने ?
अहिले नकमाए कहिले कमाउने ?
अहिले मस्ति नगरे कहिले गर्ने ?
आउनुहोस् यो उन्माद तन्त्रको,
भरपूर उपभोग गरौँ ।
कहिले राजदुत बनाउँदा लुटौँ,
कहिले राजदुत हटाएर लुटौँ ।
राजनीतिक भागबन्डाको
जाल बुनेर लुटौँ ।
किसानको जमिन भूमाफिया बनेर लुटौँ
नेता बनेर ललिता निवास लुटौँ,
शरणार्थी बनेर आफ्नै दाजुभाइ लुटौँ ।
कृषकहरू कृषि समूहको नेता बनेर आउनुस्
शिक्षक कर्मचारी संघ सङ्गठन खोलेर आउनुस्
कालो कोट हुनेहरू कालोकोट लाएरै लुटौँ
झण्डा हुनेहरू झण्डा देखाएर लुटौँ ।
हाकिमहरू हाकिम बनेरै लुटौँ
कसैले शिक्षामा लुटौँ,
कसैले स्वास्थमा लुटौँ,
ब्यापारीले कालाबजारी गरेर लुटौँ ।
यो स्वर्णिम अवसर हो,
सके जति लुट्नुहोस् ।
आफू बन्नुहोस्, आफ्नालाई बनाउनुहोस्
हामीले नलुटे कस्ले लुट्ने ?
अहिले नलुटे कहिले लुट्ने ?
हामी सबै मिल्यौँ भने
यो देश छिट्टै कङ्गाल हुन्छ,
अनि हाम्रो प्रभुको चित्त बुझ्छ ।
मिति :२०८१ असार १९ गते
Comments
Post a Comment