लघुकथा: 'अशान्ति'

 

 लघुकथा: 'अशान्ति' 

न्यू सृष्टि दैनिकमा असोज ७मा प्रकाशित

✍️ ध्रुवराज थापा 'पुरूष'

(काभ्रे, पनौती, टौखाल।हाल: कपन,काठमाडौँ।)

"निकै ठूलो चर्काचर्की पो सुनिन्छ त ! हैन के को रडाको मच्चिएछ, माथ्लो घरमा ?" सन्जयले आफ्नी श्रीमतीलाई सोधे। 

करूणाले पनि आश्चर्य व्यक्त गरिन, "खै के भाको हो ? बुढाबुढीको खासै मिल्ती छैन तिनीहरूको पनि ! हरिबाबुतपाईँकै साथी हो क्यारे ! जानुस् न एकपटक बुझेर आउनुस् ।" करूणाले श्रीमानलाई भनिन् ।

"दुबै आगो आगो ! एउटा आगो अर्को पानी भए पो हुन्छ ! ल हुन्छ के भको रहेछ म बुझेर आउँछु नि त !" भन्दै  सन्जयमाथ्लो घर तिर लागे । 

"म मुद्दा हाल्छु ! पुलिस कारबाही गराउँछु ! त्यतिकै छोड्छु भन्या होला !"भन्दै हरिकी श्रीमती चिच्याउँदै थिईन् ।

सन्जयले घर बाहिरको डिलमा उभिएर केही बेर उनीहरूका कुरा सुने, बुझे अनि फरक्क फर्किएर आफ्नो घरतिर लागे ।

"के कुरा बुझेर आउनु भयो त के रहेछ अशान्तिको कारण, थाहा पाउनुभयो ?" करूणाले आफ्ना पति सन्जयलाईसोधिन् ।

सन्जयले उत्तर फर्काए, "हरिले शान्ति ल्याएछ, त्यही भएर अशान्ति भएको रहेछ !"

रचनाकाल: २०८१ आश्विन १